Zver áfram með Þór/KA - nokkur lið voru á eftir henni

Framherjinn Mateja Zver hefur náð samkomulagi við Pepsi-deildarfélag Þór/KA um að vera áfram í herbúðum félagsins og spila með því næsta sumar.

Dragan Stojanovic, þjálfari Þórs/KA, kveðst í viðtali á heimasíðu Þórs vera í skýjunum með að halda Zver hjá félaginu.

„Ég er mjög ánægður með að okkur hafi tekist að halda henni hjá okkur. Hún er frábær leikmaður sem bæði getur skorað og lagt upp mörk. Við vitum að lið frá Rússlandi og Grikklandi sem og lið frá Íslandi reyndu að fá hana til liðs við sig og því er það ánægjuefni að hún skyldi velja að halda sig hjá okkur," sagði Dragan.

Zver skoraði 20 mörk í 18 deildarleikjum með Þór/KA síðasta sumar og varð þriðji markahæsti leikmaður deildarinnar og átti sinn þátt í að hjálpa Þór/KA til þess að enda í þriðja sæti deildarinnar sem er besti árangur í sögu félagsins í efstu deild.