Nomura tapaði meiru á íslensku bönkunum en á Madoff

Nomura Holdings stærsta verðbréfamiðlun Japans tapaði um 50 milljörðum kr. á hruni íslensku bankanna á síðasta ári. Er þetta nokkuð meira en Nomura tapaði á ponzi-svindli Bernard Madoff fjárfestis á Wall Street.

Samkvæmt uppgjöri Nomura fyrir fjórða ársfjórðung þessa árs var tap miðlunarinnar af stjarnfræðilegum stærðum. Í heildina tapaði Nomura um 450 milljörðum kr.. Af þeirri upphæð er tapið á íslensku bönkunum því rétt rúmlega 10%.

Samkvæmt frétt um málið á Bloomberg-fréttaveitunni mun tapið væntanlega leiða til þess að launa stjórnenda lækka og að einhver rekstur miðlunarinnar verður seldur frá henni til að afla lausafjár.

Bloomberg reiknar þar að auki með því að fleiri verðbréfamiðlanir og fjármálafyrirtæki í Japan muni skila afleitri afkomu eftir fjórða ársfjórðung ársins er fjármálakreppan skall á með fullum þunga.

Stærsta einstaka tap Nomura var á hlut miðlunarinnar í Fortress Investment Group í New York eða yfir 80 milljarðar kr.. Þá koma íslensku bankarnir og í þriðja sæti er Madoff. Nomura tapaði rúmlega 40 milljörðum kr. á Madoff.