Torres hefur aldrei unnið á Bernabeau

Spánverjinn Fernando Torres vonast eftir betra gengi á Santiago Bernabeau-vellinum með Liverpool en hjá Atletico Madrid.

Torres lék yfir 10 leiki með Atletico á þessum velli, skoraði aðeins eitt mark og var aldrei í sigurliði.

„Ég ber engar tilfinningar til Real Madrid en ég veit að það myndi gleðja marga hjá Atletico ef við vinnum Real. Ég gæti aldrei fagnað marki gegn Atletico en ég mun klárlega fagna ef ég skora í kvöld," sagði Torres sem er ekki enn búinn að skora í Evrópukeppninni í vetur.

„Ég finn að sjálfstraustið er að koma til baka á réttum tíma og ég er viss um að mörkin munu fylgja í kjölfarið. Það verður frábært að spila aftur í Madrid og sérstaklega þar sem ég er viss um að við munum fara áfram í þessari rimmu," sagði Torres sem er með skýringu á því af hverju honum hefur gengið svo illa að skora á Bernabeau.

„Ætli það sé ekki vegna þess að mig langaði það alltaf svo rosalega mikið. Ég var að reyna of mikið."