Iverson á leið aftur til Philadelphia?

Svo virðist sem Allen Iverson hafi fundið leið aftur í NBA-boltann en hans gamla félag, Philadephia Sixers, er talið vera til í að bjóða honum eins árs samning.

Félagið hefur ekki viljað opinbera að það sé í viðræðum við leikmanninn en viðræðurnar hafa samt lekið út.

Iverson tilkynnti í síðustu viku að hann væri hættur í körfubolta. Hann var þá búinn að leita fyrir sér að nýju félagi en ekkert lið í NBA-deildinni virtist hafa áhuga á að taka hann til sín.

Þess má geta að Iverson hefur tíu sinnum verið valinn í stjörnulið NBA-deildarinnar og var valinn besti leikmaður deildarinnar árið 2001.

Iverson á góðar minningar frá Philadelphia en hann fór með liðið alla leið í úrslitin en hringinn fékk hann ekki.