Wenger: Ronaldo var okkur erfiður

Arsene Wenger, stjóri Arsenal, var að vonum súr og svekktur eftir stórt tap Arsenal á heimavelli gegn Man. Utd.

„Í kvöld mættum við liði sem kann þá list að drepa og refsar grimmilega fyrir hver mistök. Ronaldo var okkur þess utan afar erfiður," sagði Wenger sem viðurkenndi að rauða spjaldið á Fletcher hefði verið harður dómur.

„Það sem var mest svekkjandi er að leiknum var í raun lokið áður en hann byrjaði. Við getum sjálfum okkur um kennt fyrir það. Það er svekkjandi að berjast alla þessa leið og gefa síðan svona svakalega eftir. Fáum á okkur tvö mörk á þriggja mínútna kafla og það er of mikið gegn liði sem verst eins vel og United," sagði Frakkinn.

„Þetta var bara búið eftir tíu mínútur. Við héldum samt áfram og lékum af stolti."