Lampard ánægður með að skora loksins

Frank Lampard skoraði í kvöld eitt marka Chelsea í 4-0 sigri á Atletico Madrid í Meistaradeild Evrópu í kvöld. Hann hafði ekki skorað í tíu leikjum í röð með Chelsea.

Salomon Kalou skoraði fyrstu tvö mörk Chelsea en fjórða markið var sjálfsmark.

„Stundum koma mörkin bara ekki og þannig hefur það verið hjá mér að undanförnu," sagði Lampard í sjónvarpsviðtali eftir leik.

„En ég missti aldrei trúna og ég vissi að ef ég myndi ekki hætta að leggja mig fram myndu mörkin koma með smá heppni," bætti hann við. „Ég hef ekki klárað færin mín jafnvel í ár og í fyrra. Ég hef þó haldið ótrauður áfram og ég vona að eftir þennan þurrk takist mér að skora fleiri mörk."

Hann var ánægður með spilamennsku Chelsea í kvöld. „Það stóðu sig allir virkilega vel í kvöld. Ég tel að við erum að spila góða knattspyrnu. Við erum að reyna að spila skemmtilegan bolta en líka knattspyrnu sem gengur út á styrk og liðsanda. Ef okkur tekst að blanda þessu vel saman verður útkoman góð."