Boston komið í 2-0

Nú er ljóst að baráttan um meistaratitilinn í NBA-deildinni mun ráðast á heimavelli Boston Celtics þó svo að LA Lakers vinni alla heimaleiki sína í seríunni.

Boston er komið í 2-0 í einvíginu eftir sigur á heimavelli í nótt, 108-102. Boston vann þar með báða heimaleiki sína en næstu þrír leikir fara fram í Los Angeles. Ef með þarf, fara sjötti og sjöundi leikur rimmunnar fram í Boston.

Allt útlit var fyrir öruggan sigur Boston í nótt er Lakers náði skyndilega að minnka muninn í tvö stig er tæplega mínúta var til leiksloka. Alls skoraði Lakers 41 stig í fjórða leikhluta og komst á 14-2 sprett undir lokin.

Það hefur margoft sýnt sig og sannað í úrslitakeppninni að Paul Pierce er hjarta og sál Boston-liðsins. Hann sá til þess að Lakers náði ekki að stela sigrinum í blálokin og jók muninn aftur í fjögur stig á vítalínunni þegar skammt var til leiksloka.

„Við erum með 2-0 forystu og ég er ánægður með sigurinn," sagði Doc Rivers, þjálfari Boston eftir leik. „Ég var bara ekki ánægður með spilamennsku okkar í leiknum."

Pierce var stigahæstur hjá Boston með 28 stig auk þess sem hann gaf átta stoðsendingar. Hann hitti úr öllum fjórum þriggja stiga skotum sínum í leiknum.

Leon Powe átti líka öflugan leik og skoraði 21 stig. Kevin Garnett og Ray Allen voru með sautján hver.

Hjá Lakers var Koby Bryant stigahæstur með 30 stig auk þess sem hann var með átta stoðsendingar. Pau Gasol var með sautján stig og Vladimir Radmanovic þrettán en báðir voru þeir með tíu fráköst.