Fimmhundruð íbúða hverfi í Vogum

„Þetta er eins og að handleika stýripinna í tölvuleik," sagði Birgir Örn Ólafsson, forseti bæjarstjórnar Voga, við Víkurfréttir eftir að hann hafði farið fimum fingrum um stjórntæki stórvirkrar skurðgröfu.

Verkefnið sem Birgir var að leysa var fyrsta skóflustungan að nýju 500 íbúða hverfi í Vogum. Þó svo Birgi hafi liðið eins og í tölvuleik, þá sáu viðstaddir að hann myndi strax eiga í erfiðleikum með fyrsta borð.

Eftir vandræðagang við að koma skóflunni almennilega í jörð fékk Birgir tilsöng í að ná skóflufylli af mold. Það varð til þess að eftirleikurinn var auðveldur og fyrsta skóflustungan var staðreynd. Það er verktakafyrirtækið Nesbyggð sem ætlar að byggja íbúðahverfið, sem verður fullbyggt með 500 íbúðum.

Hverfið verður byggt í tveimur áföngum og í þeim fyrri verða 250 íbúðir. Þar af verða um 50 einbýlishús, 70 íbúðir í rað- og parhúsum og restin í fjölbýlishúsum.

Framkvæmdatíminn er óljós sem stendur en verktakinn gerir sér grein fyrir þrengingum á markaði og ætlar að haga seglum eftir vindi, eins og komist var að orði ó morgun. Róbert Ragnarsson bæjarstjóri bindur miklar vonir við þetta verkefni en þegar því verður lokið hefur íbúðabyggð í Vogum verið tvöfölduð.