Þingmaður rekinn fyrir að hygla sonum sínum

David Cameron leiðtogi íhaldsmanna á breska þinginu hefur rekið Derek Conway úr þingflokknum fyrir að greiða tveimur sonum sínum yfir 80 þúsund sterlingspund af opinberu fé meðan þeir stunduðu háskólanám. Það eru yfir 10 milljónir króna.

Greiðslurnar voru færðar sem rannsóknarkostnaður. Brottreksturinn þýðir að Conway verður útskúfað úr þingflokknum. Hann heldur hinsvegar sæti sínu á þingi. Ekki er þó ljóst hvort það verður til frambúðar. Bæði siðanefnd þingsins og lögreglan eru að skoða mál hans.

Á þinginu í gær baðst Conway afsökunar á því sem hann kallaði stjórnunarmistök og dómgreindarleysi.