NBA í nótt: Shaq öflugur

Phoenix átti ekki í vandræðum með Oklahoma í NBA-deildinni í nótt þrátt fyrir fjarveru Steve Nash og villuvandræði Amare Stoudemire, þökk sé Shaquille O'Neal.

Phoenix vann leikinn, 110-102, en Nash gat aðeins spilað í níu mínútur í leiknum vegna bakmeiðsla og Stoudemire gat lítið beitt sér í leiknum.

„Þegar að Nash fór af velli og Amare lenti í vandræðum þurfti Shaq í rauninni að gerast leikstjórnandi liðsins og aðalskorari á tímapunkti," sagði Terry Porter, þjálfari Phoenix, eftir leikinn en Shaq skoraði 28 stig í leiknum og tók tólf fráköst. Alls hitti hann úr tíu af tólf skotum sínum utan af velli.

Hann færði sig upp í níunda sæti á lista stigahæstu leikmanna deildarinnar frá upphafi, upp fyrir Dominique Wilkins.

„Þetta er það sem ég hef sagt þeim allt tímabilið. Ég get enn náð svona góðum tölum. Menn virðast stundum halda að ég geti þetta ekki lengur vegna þess að ég er orðinn 35 ára gamall," sagði O'Neal eftir leik.

Jason Richardson skoraði 20 stig fyrir Phoenix og Matt Barnes nítján. Hjá Oklahoma var Russell Westbrook stigahæstur með 31 stig og Jeff Green kom næstur með 22.

Golden State vann Toronto, 117-111. Stephen Jackson skoraði 30 stig fyrir Golden State og Marco Belinelli 23.

Detroit vann Orlando, 88-82. Rodney Stuckey skoraði nítján stig fyrir Detroit sem vann sinn fjórða sigur á Orlando í röð.

Atlanta vann Denver, 109-91. Joe Johnson skoraði 25 stig fyrir Atlanta.

Chicago vann New Jersey, 100-87. Nýliðinn Derrick Rose var með 21 stig og þrettán stoðsendingar fyrir Chicago. Ben Gordon var stigahæstur með 24 stig.

Minnesota vann Memphis, 108-98, í framlengdum leik. Al Jefferson skoraði 38 stig fyrir Minnesota, þar af níu í framlengingunni. Hann tók einnig sextán fráköst í leiknum.

Washington vann Houston, 89-87. Antawn Jamison skoraði 30 stig og Andray Blatche sextán auk þess sem hann tók átta fráköst. Þetta var fyrsti sigur Washington á útivelli í síðustu sex útileikjum sínum.

Utah vann Philadelphia, 112-95. Deron Williams var með 27 stig fyrir Utah.

Staðan í deildinni.