Parker með 55 stig og flautukörfu í ótrúlegum sigri

Tony Parker bætti sitt persónulega met í NBA-deildinni er hann skoraði 55 stig og skoraði flautukörfu í ótrúlegum sigri San Antonio á Minnesota, 129-125, í tvíframlengdum leik í NBA-deildinni. Þrettán leikir fóru fram í deildinni í nótt.

Al Jefferson kom Minnesota í 116-114 þegar aðeins 2,5 sekúndur voru eftir af fyrstu framlengingunni í leiknum. Parker fékk svo sendinguna sem kom fram á völlinn og jafnaði leikinn um leið og leiktíminn rann út.

Þetta var fyrsti sigur San Antonio í deildinni í haust en Parker átti stórleik. Hann hitti úr 22 af 36 skotum, skoraði 55 stig, gaf tíu stoðsendingar og tók sjö fráköst.

Tim Duncan var með 30 stig og sextán fráköst og Roger Mason var með 26 stig. Hjá Minnesota var Jefferson stigahæstur með 30 stig og fjórtán fráköst og Mike Miller var með 25 stig.

Enn verður bið á því að Allen Iverson spili með Detroit sem vann Toronto í nótt, 100-93. Skiptin við Denver gátu ekki gengið endanlega í gegn fyrir leikinn þar sem Chauncey Billups átti eftir að klára læknisskoðun sína hjá Denver. Detroit er enn ósigrað í deildinni en Tayshaun Prince skoraði 27 stig í leiknum í nótt.

Dwyane Wade skoraði 29 stig og Mario Chalmers stal hvorki fleiri né færri en níu boltum er Miami vann Philadelphia, 106-83.

Þá vann Boston lið Oklahoma, 96-83. Paul Pierce var með 20 stig fyrir Boston.

Amare Stoudemire fór á kostum er Phoenix sem vann Indiana, 113-103, á útivelli. Stoudemire nýtti 17 af 21 skoti sínu utan af velli og öll fimmtán vítaköstin sín. Hann var alls með 49 stig.

LeBron James skoraði 41 stig fyrir Cleveland sem vann Chicago, 107-93.

Öll úrslit í nótt:

Indiana - Phoenix 103-113

Toronto - Detroit 93-100

Miami - Philadelphia 106-83

New York - Charlotte 101-98

Cleveland - Chicago 107-93

Milwaukee - Washington 112-104

Minnesota - San Antonio 125-129

New Orleans - Atlanta 79-87

Oklahoma City - Boston 83-96

Utah - Portland 103-96

Sacramento - Memphis 100-95

Golden State - Denver 111-101

LA Lakers - LA Clippers 106-88