Hver á eiginlega Keflavíkurflugvöll ?

Þegar Varnarmálastofnun tók til starfa birti utanríkisráðuneytið auglýsingu þar sem var listi yfir mannvirki sem stofnunin bæri ábyrgð á en sem væru í eigu NATO.

Á þeim lista voru meðal annars tvær lengstu flugbrautirnar á vellinum, slökkvistöð, ljósleiðari og á annað hundra önnur mannvirki á landinu.

Fréttablaðið hefur undir höndum skýrslu sem unnin var fyrir Flugmálastjórnina á Keflavíkurflugvelli henni. Í henni er meðal annars vitnað í fulltrúa mannvirkjasjóðs NATO.

Hann segir að bandalagið sem slíkt geti ekki átt nein óhreyfanleg mannvirki í einstökum bandalagsríkjum.

Þessi mannvirki séu þannig í eigu íslenska ríkisins, þótt NATO geti gert kröfu til þess að nota þau, enda greiddi mannvirkjasjóður bandalagsins fyrir þau eða endurbætur á þeim.

NATO hefur ekki gert neinar slíkar kröfur, en eitthvað af þessum mannvirkjum er auðvitað notað undir starfsemi bandalagsins, eins og til dæmis þegar frönsku orrustuþoturnar stunduðu hér eftirlitsflug.