James settur í frí frá lóðunum

Forráðamenn Cleveland Cavaliers í NBA deildinni hafa beðið framherjann LeBron James um að taka sér hvíld frá æfingum og lyftingum næstu daga.

James var sem kunnugt er í eldlínunni með bandaríska landsliðinu á ÓL í Peking og vilja forráðamenn Cleveland gæta þess að James ofreyni sig ekki skömmu áður en æfingabúðir liðsins hefjast.

James er 23 ára gamall var stigahæsti leikmaður NBA deildarinnar síðasta vetur með rúm 30 stig í leik. Hann er almennt álitinn einn besti leikmaður heimsins í dag.