Verða að ryðja okkur úr vegi til að ná í dolluna

Það er alltaf pressa á menn að standa sig, alveg sama hjá hvaða liði þeir eru í þessari deild og þegar maður er hjá stórveldi eins og KR er alltaf pressa á að ná árangri," sagði Benedikt Guðmundsson, þjálfari Íslandsmeistara KR í samtali við Vísi þegar spáin lá fyrir.

Benedikt segist vera með betra lið í höndunum á pappírunum en á síðustu leiktíð, en segir að það segi ekki alla söguna.

"Við erum sennilega með hæfileikaríkari einstaklinga innan hópsins núna en þetta lið á þó alveg eftir að sýna sömu samheldni og sanna sig sem jafn sterk heild eins og liðið í fyrra. Það er eitthvað sem við verðum að vinna í og reyna svo að toppa á réttum tíma. Við erum kannski ekki búnir að vera að spila neitt glæsilega í haustleikjunum en menn verða að ryðja okkur úr vegi ef þeir ætla sér þessa dollu," sagði Benedikt.