Slapp ómeiddur úr brennandi íbúð

Maður slapp ómeiddur út um glugga á bakhlið á brennandi íbúð við Miklubraut, á móts við Miklatún, laust fyrir klukkan átta í morgun. Allt húsið var rýmt til öryggis.

Reykur meinaði manninum útgöngu um dyrnar svo hann fór út um glugga. Slökkvilið og lögregla voru aðeins þrjár mínútur á vettvang, enda stutt í bæði lögreglustöðina og slökkvistöðina.

Í fyrstu var óttast að tveir til viðbótar væru í íbúðinni og voru sjö reykkafarar sendir inn sem leituðu af sér allan grun um það. Kjallari undir íbúðinni og tvær hæðir fyrir ofan hana voru rýmd til öryggis og reyndust þar vera um 20 manns, aðallega erlendir verkamenn af ýmsu þjóðerni. Engan þeirra sakaði og heldur ekki roskin hjón, sem búa í kjallaranum.

Skamma stund tók að ráða niðurlögum eldsins sem var staðbundinn og logaði í eldhúsinu, meðal annars í ruslafötu þar. Eldsupptök eru ókunn, en lögregla er á vettvangi að rannsaka eldsupptök.