Einkatímar hjá reyndum hryðjuverkamönnum í umferðinni

Ökuníðingum er boðið uppá námskeið, til að læra að komast undan laganna vörðum, á vefsíðunni HLS.is. Þar kemur fram að tilefnið sé hærri sektir og hert viðurlög við hraðakstri vélhjóla. Boðið er upp á hópnámskeið sem og einkatíma hjá reyndum hryðjuverkamönnum í umferðinni. Forsvarsmenn vélhjólasamtakanna segja auglýsinguna grín sem vekja eigi athygli á æsifréttamennsku fjölmiðla.

Í auglýsingu á vefsíðu samtakanna segir að vegna hækkandi hraðasekta og hertra viðurlaga við ofsaakstri hafi HSL ákveðið að gripa til róttækra aðgerða. Vegna fjöldaáskoranna verði haldið námskeið í því hvernig haga skal akstri undan laganna vörðum. Námskeiðið fari fram 23. til 24. júní. Boðið verði upp á hópnámskeið sem og einkatíma hjá reyndum hryðjuverkamönnum í umferðinni.

Umsækjendum er bent á að skoða vefsíðuna You tube, þar sem er til sýnis myndskeið af vélhjólamönnum að stinga íslensku lögregluna af í fyrra. Forsvarsmenn samtakanna segja þetta bara grín en þeir hafi ætlað að vekja athygli á æsifréttamennsku í kringum vélhjólafólk sem stuðli að slysum.