Á þriðja tug kólumbískra flóttamanna til landsins

Á þriðja tug flóttamanna kemur hingað til lands í sumar frá Kólumbíu.

Ákveðið var að taka á móti flóttamönnum þaðan vegna góðrar reynslu á móttöku þeirra hér á landi en svipaður fjöldi kom til Íslands frá Kólumbíu árið 2005.

Flóttamannanefnd hefur ákveðið að taka á móti flóttamönnum frá Kólumbíu í annað sinn en fyrir tveimur árum komu 24 flóttamenn frá Kólumbíu til landsins. Meirihluti þeirra var konur og börn. stella Víðisdóttir sviðsstjóri velferðarsviðs Reykjavíkurborgar segir móttöku flóttamannana árið 2005 hafa gengið mjög vel.

Flóttamannahópurinn sem kemur frá Kólumbíu í sumar eru einnig konur og börn úr verkefninu Women at Risk og er staðsettur í Ekvador. Stríðsástandið í Kólumbíu hefur varað í fjölmörg ár og hafa milljónir kólumbíumanna flúið landið til annarra nærliggjandi ríkja.

Flóttamannastofnun Sameinuðu þjóðanna setti upp þrjá kosti fyrir íslensku flóttamannanefndina og taldi þörfina brýnasta hjá flóttamönnum í Kólumbíu, Téténíu og Írak. Flóttamannastofnunin lagði síst áherslu á að Ísland tæki á móti flóttamönnum frá Írak því mörg önnur lönd hefðu lýst yfir vilja til að taka að sér flóttamenn þaðan. Flóttamennirnir frá Téténíu þurfa mikla aðhlynningu eftir að hafa sætt pyndingum en móttaka á þeim krefst sértækra úrræða sem ekki hafa verið undirbúin hér á landi.

Flóttamannastofnun Sameinuðu þjóðanna lagði hins vegar þunga áherslu á að Ísland tæki á móti flóttamönnum frá Kólumbíu þar sem búið væri að undibúa aðlögun kólumbískra flóttamanna áður. Ekki hefur enn verið ákveðið hvaða sveitarfélag taki við kólumbísku flóttamönnunum en félagsmálaráðuneytið hefur beðið Reykjavíkurborg um að taka á móti þeim. Ákvörðun um það verður líklega tekin um miðja þessa viku og segir Stella mikinn velvilja hjá Reykjavíkurborg að taka við flóttamönnunum.