Óbreyttir stýrivextir á evrusvæðinu

Evrópski seðlabankinn ákvað í dag að halda stýrivöxtum bankans óbreyttum í 3,5 prósentum. Jean-Claude Trichet, bankastjóri evrópska seðlabankans, segir bankann þrátt fyrir þetta fylgjast grannt með verðbólguþróun á evrusvæðinu. Greinendur segja bankastjórann hafa notað svipað orðalag mánuði fyrir næstu hækkun stýrivaxta og gera því ráð fyrir að vextir hækki að nýju í næsta mánuði.

Evrópski seðlabankinn hækkaði stýrivexti sína um 25 punkta í desember.

Verðbólga á evrusvæðinu mældist 1,9 prósent í desember í fyrra en það er óbreytt þróun frá því í október. Verðbólgan er engu að síður undir 2 prósenta verðbólgumarkmiðum seðlabankans. Helstu liðirnir sem geta aukið frekar á verðbólguna er hækkun á olíuverði, að sögn Trichets.