Ben Wallace hafði betur gegn sínum gömlu félögum

Stóri-Ben Wallace og hans menn í Chicago Bulls höfðu betur gegn gamla liðinu hans Detroit í nótt 106-89. Þetta var fyrsti leikur Wallace gegn liðinu sem hann spilaði með í 6 ár og hampaði meistaratitlinum með árið 2004.

Rip Hamilton var stigahæstur í liði Detroit með 27 stig en Luol Deng skoraði 30 stig fyrir Chicago. Ben Wallace skoraði 12 stig og hirti 14 fráköst.

Cleveland er á góðu skriði og vann sinn fjórða leik í röð í vikunni með því að leggja New Jersey að velli 96-91. Larry Hughes og Drew Gooden skoruðu 21 stig hvor fyrir Cleveland en Vince Carter og Mikki Moore skoruðu 18 hvor fyrir New Jersey.

Atlanta náði loks að stöðva níu leikja taphrinu sína með sigri á LA Clippers 86-74. Joe Johnson skoraði 27 stig fyrir Atlanta en Elton Brand var með 26 stig hjá Clippers.

Indiana lagði New Orleans á útivelli 100-93. Al Harrington og Stephen Jackson skoruðu 27 stig hvor fyrir Indiana en Desmond Mason skoraði 28 stig fyrir New Orleans.

Utah vann mikilvægan sigur á Denver á útivelli 96-84 þar sem Deron Williams skoraði 28 stig og gaf 12 stoðsendingar og Carlos Boozer skoraði 24 stig og hirti 11 fráköst - þar af 20 stig og 10 fráköst í síðari hálfleik. Allen Iverson og Earl Boykins skoruðu 22 stig hvor fyrir Denver en hittu mjög illa úr skotum sínum. Denver var án Carmelo Anthony og Marcus Camby.

Portland vann nokkuð óvæntan útisigur á Sacramento 110-105 í framlengingu. Zach Randolph skoraði 32 stig og hirti 15 fráköst fyrir Portland en Mike Bibby skoraði 28 stig fyrir Sacramento.

Loks vann Golden State sigur á Seattle á heimavelli 108-104 eftir að hafa verið undir fram í þriðja leikhluta í leiknum á NBA TV. Ray Allen skoraði 38 stig fyrir Seattle en Baron Davis skoraði 22 stig, gaf 11 stoðsendingar og hirti 7 fráköst fyrir Golden State.