Ýmsar nýjungar í læknisfræði

Helstu nýjungarnar í heilbrigðisgeiranum er einfaldur og léttur búnaður. Þetta segir dr. Andrew Fry, forstjóri breska ráðgjafafyrirtækisins Team sem staðsett er í iðagrænni sveit í nokkuð hundruð ára gamalli hlöðu um tíu kílómetra fjarlægð frá Cambridge.

Hann segir helsta vandamálið við sprautur sem notaðar séu í dag þær að nálarnar geti stungist í þá sem ekki ætla að nýta sér þær, svo sem hjúkrunarkonur og lækna, auk þess sem sjúklingar sem þurfi á mörgum sprautum að halda geti átt í erfiðleikum með að finna æðar. Þá er hætt við að nálar brotni, að hans sögn.

Ráðgjafafyrirtækið Team hannar og þróar tól og tæki fyrir lyfja- og heilbrigðisgeirann um allan heim. Tækin eru talsvert frábrugðin því sem flestir þekkja í dag en á meðal þeirra er nálalaus sprauta og augnskoðunartæki á stærð við penna sem hægt er að nota jafnt á menn sem dýr.

Nálalausa sprautan samanstendur af hylki í tækinu neðanverðu sem hægt er að fylla á með venjulegu kveikjaragasi sem hægt er að kaupa á næstu bensínstöð. Lyfin eru að sama skapi nokkuð frábrugðin því sem við eigum að venjast í dag því þau eru í litlum hylkjum sem sett eru í rauf á sprautunni og þeim skotið inn undir húð sjúklinga á mun skemmri tíma en það tekur að nota hefðbundna sprautunál.

Það er ekki nauðsynlegt að hitta á æðar, að sögn Frys, sem segir jafnt lærða sem leika geta nýtt sér sprautuna sem er nokkuð einföld í meðförum. Og möguleikarnir eru margir því sprautuna er hægt að nota jafnt á dýr sem menn, sem marga hverja óar við tilhugsuninni um beitta nál.

Dr. Iain Simpson, einn af helstu ráðgjöfum Team, bendir á að hægt verði að bólusetja fjölda fólks með sprautu sem þessari, ekki síst á þeim svæðum þar sem faraldur hefur brotist út. Þá er bólusetning dýra mun einfaldari því allt ferlið tekur ekki nema eina mínútu. Þrátt fyrir þetta gat enginn svarað því til, hvort meiri sársauki fylgi því að skjóta lyfjum í líkama fólks en að stinga á húð þess með oddhvassri nál. Tækið er ekki komið á markað en tilraunir við bólusetningu á svínum hafa gefist vel, að sögn Simpsons.

Dr. Andrew Fry var sérstaklega stoltur af nýjasta tæki Team, augnskoðunartæki sem er á stærð við penna. Roger Armour, einn af forsvarsmönnum dótturfyrirtækis Team, sem hóf að þróa ýmsan tækjabúnað fyrir lækna eftir að hann fór á eftirlaun, á heiður að tækinu.

Tækið samanstendur af lítilli AAA-rafhlöðu að neðanverðu en peru og agnarsmáum linsum að ofanverðu. Beri notandi tækið upp að augum sjúklinga sést vel inn fyrir ysta lag augans. Fry sagði tækið mjög einfalt í notkun og að það greindi augnsjúkdóma, svo sem gláku, mun fyrr en ella. Þá getur tækið ekki síður nýst dýralæknum, sem þurfa að skoða mörg dýr í einu.

Tiltölulega einfalt er fyrir leikmenn að nota tækið, sem er létt í meðförum og margfalt ódýrara en sambærileg tæki á markaðnum í dag. Þá einfaldar það mjög skoðun á augum barna, sem kunna að vera hrædd við lækna.

Að sögn þeirra Frys og Armour er reiknað með að betrumbæta tækið á næstu árum, meðal annars að bæta við stafrænni myndavél og litlum kubbi, sem skráir ýmsar upplýsingar um innviði augans.

Stór markaður er fyrir tæki sem þetta, að sögn Fry, sem reiknast til að sala á því geti numið allt að 400 milljónum evra, jafnvirði 35,5 milljarða íslenskra króna. Markaðssetning á tækinu hófst í fyrra en samningar náðust við stóra dreifingaraðila í Bandaríkjunum um miðjan síðasta mánuð.