Fluttu inn 6,5 kíló af amfetamíni

Réttað var yfir tveimur Litháum í Héraðsdómi Reykjavíkur dag en þeir fluttu samtals inn til landsins sex og hálft kíló af amfetamíni í lok sumars.

Mennirnir komu báðir með ferjunni Norrænu til landsins 31. ágúst. Við komu fundu tollverðir fíkniefni í bílum beggja. Annar þeirra er rúmlega þrítugur og er búsettur hér á landi. Hann hafði falið vandlega tæp fjögur og hálft kíló af amfetamíni bakvið og undir mælaborði í Audi-bifreið. Maðurinn er einnig ákærður fyrir ölvunarakstur og þess er krafist að bíll hans, sem skráður er hér á landi, verði gerður upptækur. Hinn maðurinn er tuttugu og fjögurra ára. Hann faldi tæp tvö og hálft kíló af amfetamíni í BMW-bifreið en tollverðir fundu efnin í drifskafti bílsins. Brot mannanna geta varðað allt að sex ára fangelsisvist.