Gummersbach lagði Celje Lasko

Lærisveinar Alfreðs Gíslasonar í Gummersbach unnu í kvöld afar mikilvægan sigur á sterku liði Celje í Meistaradeildinni í handbolta 34-31, eftir að hafa verið tveimur mörkum undir í hálfleik 16-14. Þá unnu Viggó Sigurðsson og félagar í Flensburg 34-29 sigur á Medwedi í sömu keppni.

Róbert Gunnarsson skoraði 6 mörk úr 6 skotum fyrir Gummersbach og Guðjón Valur Sigurðsson skoraði 3 mörk. Nandor Fazekas varði 17 skot í marki Gummersbach, en þeir Alexis Alvanos, Momir Ilic og Vedran Zrnic skoruðu 7 mörk hver.

Um helgina eigast svo við Sandefjord og Fram, sem verma botnsæti riðilsins, en leikur liðanna verður sýndur beint á Sýn klukkan 16:45 á laugardaginn.