Þrjár skólastúlkur liggja í valnum eftir að óður byssumaður æddi síðdegis í dag inn í sveitaskóla í Pennsylvaníu í Bandaríkjunum og skaut á nemendur. Sjö stúlkur særðust lífshættulega í árásinni.
Í Lancaster-sýslu í Pennsylvaníu býr fjöldi fólks sem aðhyllist hina friðsömu en íhaldssömu Amish-trú og skólinn sem ráðist var inn í dag er rekinn af þeirri kirkjudeild.
Svo virðist að fljótlega eftir að kennsla hófst í skólanum hafi ókunnur maður, vopnaður haglabyssu og skammbyssu ráðist inn í skólann og tekið bekk með á annan tug telpna á aldrinum 6 til 13 ára í gíslingu.
Hann sleppti piltunum í bekknum lausum auk kennara sem var ólétt og tveimur starfssystrum hennar sem voru með ung börn með sér. Þegar lögregla kom á vettvang hótaði maðurinn að hefja skothríð og áður en nokkuð varð við ráðið lét maðurinn til skarar skríða.
Samkvæmt fréttavef CNN mun árásarmaðurinn hafa bundið stúlkurnar á fótum og raðað þeim upp við töflu í skólastofunni og síðan skotið þær hverja af annarri áður en hann beindi byssunni að sér og tók eigið líf. Þrjár stúlkur létust og sjö aðrar særðust lífshættulega.
Árásarmaðurinn hét Charles Carl Roberts IV og var 32 ára. Hann var vöruflutningabílstjóri. Að sögn lögreglu mun árásin hafa verið gerði til að hefna atburða fyrir tveimur áratugum. Hann var ekki Amish-trúar, var ekki eftirlýstur af lögreglu og ekki vitað til þess að hann hefði áður komist í kast við lögin.
Roberts mun hafa skilið miða eftir á heimili sínu handa eiginkonu og þremur börnum. Þeir munu vera samhengislausir og líkjast skilaboðum manns sem ætlar að svipta sig lífi.
Morðárásir í skólum í Bandaríkjunum| September 2006 | Unglingspiltur myrti yfirkennara í skóla í Wisconsin. |
| September 2006 | Byssumaður í Colorado myrti unglingsstúlku og svipti sig lífi. |
| Nóvember 2005 | Nemandi í skóla í Tennessee myrti aðstoðarskólastjórann og særði tvo yfirkennara. |
| Mars 2005 | Skólastrákur í Minnesota myrti níu nemendur og kennara, sviptir sig síðan lífi. |
| Maí 2004 | Fjórir særðir eftir skotárás í skóla í Maryland. |
| Apíl 2003 | Unglingur myrti yfirkennara í skóla Pennsylvaníu, sviptir sig svo lífi. |
| Mars 2001 | Unglingur skaut á samnemendur sína í skóla í Kaliforníu, tveir nemendur létust af sárum sínum. |
| Febrúar 2000 | Sex ára stúlka skotin til bana af skólafélaga sínum í Michigan. |
| Nóvember 1999 | 13 ára stúlka skotin til bana af skólafélaga sínum í Nýju Mexíkó. |
| Maí 1999 | Námsmaður særði sex nemendur í skotbardaga í skóla í Georgíu. |
| Apríl 1999 | Tveir námsmenn í Colombine-skólanum í Colorado skutu 12 samnemendur sína og einn kennara til bana áður en þeir sviptu sig lífi. |
| Júní 1998 | Tveir særðust í skotárás unglings í skóla í Virginíu. |
| Maí 1998 | 15 ára skólastrákur svipt sig lífi eftir að hafa tekið skólasystur sína í gíslingu. |
| Maí 1998 | 15 ára nemandi myrti tvo samnemendur sína í mötuneyti í skóla í Oregon. |
| Apríl 1998 | 14 ára nemandi myrti kennara og særðu tvo nemendur í skotárás í skóla í Pennsylvaníu. |
| Mars 1998 | Tveir drengir, 11 og 13 ára, myrtu fjórar stúlkur og kennara í skóla í Arkansas. |
| Desember 1997 | 14 ára skólastrákur myrti þrjá samnemendur í skóla í Kentucky. |
| Október 1997 | 16 ára skólastrákur myrti móður sína og tvo nemendur í skóla í Mississippi. Fjölmargir særðust í árásinni. |
