Fótboltaveisla á Sýn um helgina

Það verður mikið um dýrðir á sjónvarpsstöðinni Sýn um helgina og næstu daga, en þá verður á dagskrá fjöldi beinna útsendinga frá leikjum í undankeppni EM og þá verða athyglisverðir vináttuleikir inn á milli. Þá verður Sýn einnig með beinar útsendingar frá Deutsche Bank mótinu í golfi.

Veislan hefst á morgun klukkan 13:30 þegar Íslendingar sækja Norður-Íra heim í Belfast, en leikurinn hefst klukkan 14. Klukkan 16 verður leikur Englands og Andorra í beinni útsendingu og klukkan 18:40 verður leikur Þjóðverja og Íra sýndur. Síðar um kvöldið verður svo útsending frá Deutsche Bank mótinu í golfi.

Á sunnudag verður bein útsending frá stórleik Argentínu og Brasilíu frá Emirates vellinum í London, en hér er um að ræða vináttuleik þessara frábæru knattspyrnuþjóða. Um kvöldið verður svo áfram fylgst með gangi mála á Deutsche Bank mótinu í golfi.