Nágranni sá þjófinn

Það var athugull nágranni sem sá til innbrotsþjófs setja muni í tösku í fjölbýlishúsi í gær. Nágranninn skaut þjófnum skelk í bringu sem lagði á flótta án þess að taka töskuna með sér. Þó að þjófurinn hafi sloppið björguðust verðmætin þökk sé nágrannanum.

Einnig var brotist inn í þrjá bíla í gær og verðmætum stolið úr tveimur þeirra. Munum var stolið úr fellihýsi en þar á meðal var veiðidót, rafgeymir og gaskútar. Nokkuð hefur verið um að gaskútar séu teknir ófrjálsri hendi og lögregla hvetur fólk til að vera á varðbergi. Best er auðvitað að geyma gaskúta á öruggum stöðum ef því verður við komið.