Nemendur í Rimaskóla gefa til ABC-Barnahjálpar

Nemendur í níunda R í Rimaskóla sýndu í morgun svo ekki verður um villst aðþað býr ýmislegt í ungmennum þessa lands. Þá afhentu þeir ABC-barnahjálpinni 75 þúsund krónur sem bekkurinn hafði fengið í verðlaunafé fyrir góðan árangur í keppninni Reyklaus bekkur punktur is á síðasta skólaári. Til stóð að fara í veglega óvissuferð í haust en í lífsleiknitíma fyrir skemmstu ákvað bekkurinn í leynilegri atkvæðagreiðslu að láta bágstödd börn frekar njóta góðs af verðlaununum. Þegar Netbankinn og Barnaland.is fréttu af þessu ákváðu fyrirtækin að leggja fram sömu upphæð og tók ABC-barnhjálpin því við 150 þúsund krónum í stofu bekkjarins í dag.