Framtíð Carlos Tevez enn óljós

Bresku slúðurblöðin hafa mikinn áhuga á máli argentínska framherjans Carlos Tevez hjá Corinthians í Brasilíu, en framherjinn ungi og öflugi hefur verið orðaður við Manchester United og Arsenal á síðustu dögum. Blöðunum ber ekki saman um hvar hann kemur til með að enda, en nú styttist óðum í að félagaskiptaglugginn lokist í Evrópu.

The Sun heldur því fram að Tevez muni gangast undir læknisskoðun hjá Arsenal strax í dag, að því búnu að hann nái að ganga frá lausum endum hjá brasilíska félaginu þar sem hann er fallinn í ónáð hjá stuðningsmönnum.

The Daily Star er hinsvegar á öðru máli og segir hann vera á leið til Manchester United, en þó segir í frétt blaðsins að leikmaðurinn vilji heldur fara til London og því sé Arsenal líklegra til að hreppa hann. Þar er því haldið fram að kaupverðið verði um 18 milljónir punda.