Vissi að við ættum möguleika

Steve Coppell var að vonum ánægður með sína menn í Reading í dag þegar lið hans innbyrti sigur í fyrsta leik sínum í ensku úrvalsdeildinni gegn Middlesbrough með ótrúlegum hætti. Hann sagði úrslitin mjög mikilvæg fyrir sig og leikmenn sína.

"Þetta var skemmtilegur leikur og þó ég sé viss um að bæði lið vildu hafa gert færri mistök, get ég ekki annað en glaðst yfir því hvernig okkur tókst að koma til baka eftir að lenda undir 2-0. Mínir menn voru taugatrekktir í byrjun eins og búast mátti við, en um leið og við náðum inn fyrsta markinu og fórum að spila eins og menn, vissi ég að við ættum möguleika.

Heillaóskaskeytunum og símhringingunum hefur rignt inn á mig og leikmennina í allan dag og við erum komnir upp í úrvalsdeildina til að láta finna fyrir okkur," sagði Coppell ánægður.