Umferð gengur vel víða um land

Umferð hefur gengið vel víða um land en svo virðist sem straumur ferðalanga liggi norður á Akureyri. Búist er við að mörg þúsund manns ætli sér að eyða helginni við skemmtan á hátíðinni Ein með öllu. Mikil umferð hefur verið í bæinn, sem og um bæinn og úr honum. Að sögn lögreglu hefur hún þó gengið vel en umferðin er þétt og ökumenn aka á löglegum hraða. Umferðin hefur sömuleiðis gengið vel um Suðurland fram til þessa en er þó tekin að þyngjast. Um 1200 manns eru nú komin á bindindismótið í Galtalæk og að sögn mótshaldara hafa selst um 2000 miðar til viðbótar í forsölu. Ágætis veður er á svæðinu og er því búist við að fjöldi fólks leggi leið sína þangað um helgina.