Tónleikar Sigur Rósar í kvikmyndahúsi í London

Tónleikar Sigur Rósar á Miklatúni í gærkvöldi voru ekki bara vel sóttir hér á landi heldur var fullt hús í kvikmyndahúsinu National Film Theatre í London þar sem tónleikunum var sjónvarpað beint á kvikmyndatjald. Forsvarsmenn hljómsveitarinnar eru ánægðir með tónleikana í heild sinni en segja þetta ekki hafa verið lokahnikkinn á tónleikum þeirra hér á landi að þessu sinni, því búast megi við að Sigur Rós bjóði upp á tónleika úti á landi á næstunni. Talið er að um fimmtán þúsund manns hafi sótt tónleika hljómsveitarinnar á Miklatúni í gærkvöldi. Sjá mátti ummerki tónleikanna á Miklatúni í morgun þar sem rusl fauk um allar trissur en starfsmenn borgarinnar byrjuðu þó snemma að hreinsa svæðið.