Menntamálaráðuneytið leitar allra leiða til að vernda LÍN

Eftirlitsstofnun EFTA krefst þess að skilyrði um að Evrópubúar hafi búið á Íslandi í tvö ár, áður en þeir geta fengið lán hjá Lánasjóði íslenskra námsmanna, verði fellt úr gildi. Þorgerður Katrín Gunnarsdóttir, menntamálaráðherra, segir ekki koma til greina að skilja Lánasjóð íslenskra námsmanna eftir galopinn.

Á ríkisstjórnarfundi í gær var rædd staða Lánasjóðs íslenskra námsmanna í ljósi athugasemda Eftirlitsstofnunar EFTA. Menntamálaráðherra fór yfir þau skref sem verða tekin á næstunni og hvaða þýðingu það hefði fyrir lánasjóðinn ef kröfur eftirlitsstofnunarinnar næðu fram að ganga.

Að áliti eftirlitsstofnunar EFTA brýtur skilyrði Lánasjóðsins um búsetu lánþega í bága við samninginn um Evrópska efnahagssvæðið. Stofnunin krefst þess að búsetuskilyrðin verði felld niður.

Þorgerður Katrín segir nauðsynlegt að Lánasjóður íslenskra námsmanna haldi áfram að vera öflugur sjóður. Stuðningur lánasjóðsins sé ein ástæða fjölgunar námsmanna á háskólastigi. Þorgerður Katrín segir að til að byrja með muni menntamálaráðuneytið skoða leiðir til að koma til móts við Eftirlitsstofnunina án þess að hverfa frá meginhugsuninni með Lánasjóði íslenskra námsmanna. Lánasjóðurinn sé lykillinn að fjölbreytni háskólasamfélagsins. Unnið verði í tengslum við norska menntamálaráðuneytið sem stendur í svipuðum sporum varðandi lán til námsmanna.

Ef niðurstöður þessara þreifinga verða ekki fullnægjandi segir Þorgerður Katrín líklegt að farið verði með málið fyrir EFTA-dómstólinn. Ekki komi til greina að hafa lánasjóðinn galopinn og óútfylltan tékka fyrir alla á Evrópska efnahagssvæðinu.

Menntamálaráðherra ítrekar að ekki sé verið að mismuna fólki eftir uppruna með búsetuskilyrðunum. Þessi skilyrði eigi jafnt við um Íslendinga og fólk af erlendum uppruna og hafa ekki síður komið niður á lánsmöguleikum Íslendinga.