Hamann fer ekki til Bolton

Þýski miðjumaðurinn Dietmar Hamann hjá Liverpool hefur nokkuð óvænt hætt við að ganga í raðir Bolton. Liverpool hafði gefið grænt ljós á að leikmaðurinn færi og aðeins átti eftir að ganga frá formsatriðum í nýjum samningi hans við Bolton, en nú hefur félagið gefið það út að ekkert verði af félagaskiptunum því Þjóðverjinn hafi skipt um skoðun.

Bolton greinir frá því í fréttatilkynningu að Hamann hafi hætt við á síðustu stundu, því annað lið hafi komið inn í myndina hjá honum og því er slegið sem föstu að hann gangi í raðir þess innan tveggja sólarhringa. Talið er að þetta lið sé Manchester City.