Ætlar að sparka hressilega í Rooney

Ulises De La Cruz, varnarmaður Ekvador og Aston Villa, ætlar að láta reyna á það hvort fótbrotið hans Wayne Rooney sé gróið þegar liðin mætast í 16-liða úrslitunum á HM á sunnudaginn.

"Það vinnur með okkur að Rooney skuli enn ekki vera kominn í fullt leikform og ég mun eflaust láta reyna á það hvort hann er orðinn góður af meiðslunum. Ætli ég gefi honum ekki gott spark til að sjá hvort hann er búinn að ná sér. Ég mun sannarlega komast að því hvort hann er orðinn 100% góður af meiðslunum. Ég hef góða reynslu af því að spila á móti ensku landsliðsmönnunum og því er fátt sem kemur mér á óvart við þá," sagði kokhraustur De La Cruz.