Eins og við værum tólf á vellinum

Jose Mourinho var afar ánægður með sigur sinna manna í Chelsea á West Ham í dag, þar sem heimamenn lentu marki undir og misstu mann af velli snemma leiks - en náðu að snúa dæminu við og vinna stórsigur. Mourinho sagði að sínir menn hefðu litið út fyrir að vera manni fleiri inni á vellinum en ekki einum færri eins og raun bar vitni.

"Hver einasti leikmaður minn var frábær í dag og þetta var ótrúleg frammistaða hjá liðinu. Að lenda í svona mótlæti í byrjun en ná að snúa leiknum okkur í hag var stórkostlegt afrek. Það er ekkert eðlilegt að vinna leik 4-1 eftir að lenda marki undir og vera manni færri, en í spiluðu mínir menn eins og þeir væru tólf inni á vellinum en ekki tíu," sagði Mourinho.

"Chelsea svaraði með frábærum leik eftir að lenda manni undir, en þess ber að geta að þetta voru 10 toppklassa leikmenn sem efldust við mótlætið og tóku okkur í kennslustund. Chelsea hefur orðið fyrir mikilli gagnrýni að undanförnu og mikið af þessari gagnrýni er ósanngjörn - en þeir svöruðu henni svo sannarlega á vellinum í dag," sagði Alan Pardew, stjóri West Ham.