Shearer óhress með Wright-Phillips

Alan Shearer, fyrirliði Newcastle, var allt annað en ánægður með það sem hann kallaði leikræna tilburði kantmannsins Shaun Wright-Phillips hjá Chelsea í leik liðanna í enska bikarnum í gærkvöld. Phillips fiskaði þá Robbie Elliott útaf með sitt annað gula spjald.

"Þetta var ekkert annað en leikaraskapur hjá honum, ég sá það í leiknum og sannfærðist enn frekar um það þegar ég skoðaði myndbandið eftir leikinn," sagði Shearer, sem fékk gult spjald fyrir að mótmæla harðlega í kjölfarið. Þar með rann Shearer úr greipum síðasta tækifærið til að vinna titil með Newcastle, því hann ætlar að leggja skóna á hilluna í vor.