Yfirmaður landsliðs Suður-Afríku í knattspyrnu vill ólmur fá Sven-Göran Eriksson til að stýra landsliðinu á rétta braut, en Suður-Afríka reið ekki feitum hesti frá Afríkukeppninni í vetur og þar á bæ hafa menn lítinn áhuga á að líta illa út þegar þeir halda heimsmeistaramótið árið 2010.
"Sven hefur verið óhræddur við að byggja á ungum leikmönnum og það er nokkuð sem við þurfum að taka til fyrirmyndar, því Suður-Afríka þarf að stokka upp og byggja lið til framtíðar. Okkur gekk skelfilega í Afríkukeppninni og nú þurfum við öflugan mann til að stýra okkur inn í framtíðina og ég held að peningar verði ekki vandamál þegar að því kemur," sagði Danny Jordaan.
