Mourinho ætlar að tvídekka Messi

Jose Mourinho hefur gefið það út að hann ætli að láta leikmenn sína tvídekka ungstirnið Lionel Messi hjá Barcelona í leik liðanna á Nou Camp í kvöld. Messi fór á kostum í fyrri leik liðanna á Stamford Bridge, en Mourinho ætlar ekki að láta það koma fyrir aftur.

"Við munum hafa hann í strangri gæslu í kvöld, því hann er mjög skæður þegar hann rekur boltann. Við ætlum að tvídekka hann þegar hann fær boltann, en það er auðvitað ekki hægt þegar maður er aðeins með tíu menn inni á vellinum," sagði Mourinho og vísaði til þess að Chelsea missti mann útaf í fyrri leiknum.

Mikil spenna ríkir fyrir leik kvöldsins og þótti forráðamönnum UEFA ástæða til að láta bæði lið vita af því að vel yrði fylgst með gangi mála í leiknum, því mikill hiti hefur verið í viðureign liðanna í ár rétt eins og í fyrra.

Leikur kvöldsins verður sýndur í beinni útsendingu á Sýn og hefst klukkan 19:30. Þá verður leikur Juventus og Werder Bremen í beinni á Sýn Extra og leikur Villareal og Rangers verður í beinni á Sýn Extra 2 og hefjast allir leikirnir á sama tíma.