Írski landsliðsmaðurinn Robbie Keane skrifaði í dag undir nýjan fjögurra ára samning við úrvalsdeildarlið Tottenham og bindur þar með enda á vangaveltur um að hann sé á leið frá félaginu. Keane er 25 ára og kom til liðsins frá Leeds. Hann hefur skorað 54 mörk í 145 leikjum fyrir Tottenham.
"Ég er mjög ánægður að vera búinn að semja við Tottenham, því mér þykir þetta lið vera á mikilli uppleið og það var ástæðan fyrir því að ég ákvað að koma hingað á sínum tíma. Ég á marga góða vini í liðinu og við höfum verið að bæta við okkur góðum leikmönnum að undanförnu, sem er enn frekari staðfesting á því að félagið er á réttri leið," sagði Keane.
