Stórleikur Kirilenko of mikið fyrir Toronto

Utah Jazz vann sannfærandi sigur á Toronto Raptors í NBA deildinni í nótt 111-98, þar sem Andrei Kirilenko náði fyrstu þreföldu tvennu sinni á ferlinum þegar hann skoraði 18 stig, hirti 16 fráköst og gaf 10 stoðsendingar. Hann varði auk þess 4 skot og stal 3 boltum í leiknum.

Mehmet Okur var ekki síðri í liði Utah og skoraði 29 stig, hirti 6 fráköst og gaf 7 stoðsendingar. Chris Bosh var með 27 stig fyrir Toronto í leiknum.

Phoenix Suns steinlá mjög óvænt gegn Sacramento 119-90 á útivelli. Shawn Marion skoraði 25 stig fyrir Phoenix og Raja Bell 19, en hjá Sacramento var Kevin Martin stigahæstur með 25 stig, Kenny Thomas skoraði 22 stig og hirti 15 fráköst, Francisco Garcia skoraði 21 stig og hirti 10 fráköst, Brad Miller skoraði 18 stig, hirti 12 fráköst og gaf 9 stoðsendingar og Mike Bibby skoraði 19 stig.