Endurskoðuð flugslysaáætlun

Forsvarsmenn almannavarna á Keflavíkurflugvelli og ríkislögreglustjóri undirrituðu í gær nýja og endurskoðaða flugslysaáætlun fyrir Keflavíkurflugvöll.  

Áætlunin er virkjuð þegar flugvél lýsir yfir viðbúnaðar- eða hættuástandi um borð eða flugvél brotlendir. Virkjun er tvískipt, annars vegar þegar um er að ræða flugvél með níu manns eða færri eru um borð og hins vegar þegar tíu eða fleiri eru um borð. Einnig er mögulegt að virkja áætlunina á hærra stiginu ef farmur flugvélar getur hugsanlega valdið almannahættu þó svo að níu manns eða færri séu um borð.

Flugvallarstjórinn á Keflavíkurflugvelli hefur umsjón með reglubundnum æfingum einstakra verkþátta og að allir þættir áætlunarinnar séu æfðir að minnsta kosti á tveggja ára fresti í samvinnu við aðgerðastjórn og almannavarnadeild ríkislögreglustjóra.

Flugslysaáætlun Keflavíkurflugvallar segir fyrir um skipulag og stjórnun aðgerða í kjölfar flugslyss á Keflavíkurflugvelli eða annars staðar á Reykjanesskaga. Allir viðbragðsaðilar og aðrir aðilar sem hagsmuna hafa að gæta voru hafðir með í ráðum við gerð áætlunarinnar sem tekið hefur alllangan tíma.