Grunaður um barnamisnotkun

Karlmaður á sextugsaldri hefur verið kærður fyrir kynferðisbrot gegn þremur ungum stúlkum á samkomu línudansara í Heimalandi í Rangárþingi um verslunarmannahelgina.

Samkvæmt heimildum Fréttablaðsins er maðurinn grunaður um að hafa berað kynfæri sín fyrir framan þrjár 8 til 12 ára stúlkur í anddyri húss á meðan aðrir gestir voru staddir í samkomusal hússins. Þá er hann grunaður um að hafa leitað á yngstu stúlkuna og meðal annars þreifað á kynfærum hennar. Maðurinn, sem ku hafa verið ölvaður, stökk síðan á flótta þegar ein stúlknanna hótaði að kalla á föður sinn.

Það mun einnig vera í rannsókn hvort maðurinn hafi fyrr um daginn leitað á fjórðu stúlkuna, en sú er fimm ára gömul.

Maðurinn var sjálfur gestur á samkomunni og því er vitað hver hann er, þótt enn sé hann ófundinn. Móðir einnar stúlkunnar mun hafa gengið í hús í nágrenni þekktra aðsetra mannsins í höfuðborginni með mynd af honum og varað íbúa við honum.

Lögreglan á Hvolsvelli fer með rannsókn málsins en vill ekkert gefa upp um það að svo stöddu.