Góður útisigur

Arsenal er komið langleiðina í aðalkeppni Meistaradeildar Evrópu eftir að hafa unnið Dinamo Zagreb örugglega 3-0 á útivelli í gær. Þetta var fyrri viðureign liðanna í þriðju umferð forkeppninnar en mörk Arsenal komu öll í seinni hálfleik. Cesc Fabregas skoraði tvö af mörkunum en mínútu eftir að hann braut ísinn á 63. mínútu skoraði Robin Van Persie eftir að hafa fengið langa sendingu frá Alexander Hleb.

Jose Antonio Reyes sat allan tímann á varamannabekk Arsenal og þykir það benda til þess að hann verði seldur til Real Madrid. Ef hann hefði komið við sögu hefði hann ekki orðið löglegur með öðru liði í Evrópukeppninni þetta tímabil.