Fyrsta markið fyrir Barcelona

Landsliðsfyrirliðinn Eiður Smári Guðjohnsen skoraði í gær sitt fyrsta mark í búningi Barcelona en hann er nýgenginn í raðir Spánar- og Evrópumeistaranna. Markið kom í æfingaleik við UANL Tígrana í Mexíkó. Barcelona sigraði með þremur mörkum gegn engu og skoraði brasilíski snillingurinn Ronaldinho eitt mark úr aukaspyrnu, en hann kom inn sem varamaður í leiknum líkt og Eiður Smári.

Þá lagði Ronaldinho upp mark Eiðs með stungusendingu en hitt mark leiksins var sjálfsmark hjá heimamönnum. Mark Eiðs var síðasta mark leiksins og kom það á 77. mínútu. Hann fékk góða dóma fyrir frammistöðu sína í leiknum. Börsungar eru í æfingaferð um Mexíkó og Bandaríkin en liðið flaug í gær til Los Angeles og mun á morgun leika æfingaleik gegn CD Guadalajara.