Pascal Chimbonda alls ekki sáttur við Wigan

 Franski bakvörðurinn Pascal Chimbonda er orðinn mjög pirraður út í félag sitt Wigan sem heimtar háa greiðslu frá Tottenham, vilji þeir kaupa hann. Tottenham hafa boðið tvisvar í Chimbonda sem sló í gegn með spútnikliði Wigan á síðasta tímabili eftir að hann kom frá Bastia fyrir fjögur hundruð þúsund pund fyrir ári síðan.

Ég sé þetta ekki gerast úr þessu vegna þess hversu mikið þeir vilja fá fyrir mig. Það er ótrúlegt að þeir heimti 5,25 milljónir punda fyrir mann sem þeir keyptu fyrir miklu minna fyrir tólf mánuðum. Mér var sagt í janúar, þegar ég skrifaði undir nýjan samning, að þeir myndu ekki standa í vegi fyrir mér ef toppklúbbur vildi fá mig, sagði Chimbonda, sem er alls ekki sáttur.

Ég hefði getað farið í janúar en ég ákvað að hjálpa Wigan út tímabilið. Ef þeir vilja ekki selja mig þá bjóða þeir mér kannski samning sem hæfir manni sem kostar 5,25 milljónir punda, bætti varnarmaðurinn við.