Segir forsvarsmenn Neyðarlínu rjúfa sátt

Róbert Bragason, stjórnarformaður Atlassíma, segir forsvarsmenn Neyðarlínunnar hafa rofið samkomulag sem gert var við Atlassíma 25. nóvember á síðasta ári, með því að kæra bráðabirgðaákvörðun Póst- og fjarskiptastofnunar. Ákvörðunin skyldaði Símann hf. til þess að samþykkja að flytja símanúmer í almennri talsímaþjónustu yfir í netsímaþjónustu til Atlassíma ehf.

Yfirlýsing tiltekur bæði almenna símaþjónustu með netsímatækni og flökkuþjónustu með netsímatækni. Í yfirlýsingunni er sérstaklega tekið fram, að Neyðarlínan fallist á tilhögun sem við höfum farið eftir, og munum fara eftir, í einu og öllu. Þess vegna finnst mér kæran brjóta gegn þessu samkomulagi, segir Róbert.

Þórhallur Ólafsson, framkvæmdastjóri Neyðarlínunnar, neitar því að samkomulag hafi verið rofið með kærunni. Aðeins hefði vakað fyrir talsmönnum lögreglu og Neyðarlínu að vekja athygli á því að nauðsynlegt væri að setja skýrar reglur er varða staðsetningu símtala í netþjónustu, til þess að öryggi almennings væri sem best tryggt. Fyrst og fremst, snýr okkar aðkoma að þessu máli að því að við teljum nauðsynlegt að almennar reglur verði í hávegum hafðar, sem hægt er að styðjast við til framtíðar.

Í yfirlýsingunni, sem Fréttablaðið hefur undir höndum, ná Atlassími og Neyðarlínan samkomulagi um að Atlassími sendi rafrænt skráningarupplýsingar einu sinni á sólarhring sem innihalda hefðbundnar upplýsingar um rétthafa númers. Auk þess sem svokölluð flökkunúmer, sem tilheyra þjónustu þar sem notendur geta nýtt sér netsíma þar sem þeir komast í internetsamband, væru sérstaklega merkt þannig að Neyðarlínan gæti áttað sig á hver þau væru, eins og segir orðrétt í yfirlýsingunni.

Í yfirlýsingunni segir jafnframt að það yrði á ábyrgð Neyðarlínunnar að skrá númer viðskiptavina Atlassíma sem flökkunúmer við símsvörun.

Þórhallur skrifar undir yfirlýsinguna, en í lok hennar er sérstaklega tekið fram að ofanlýst högun teljist fullnægjandi skráning að mati Neyðarlínunnar.

Eins og greint var frá í Fréttablaðinu 21. júlí vísaði úrskurðarnefnd fjarskipta- og póstmála stjórnsýslukæru Ríkislögreglustjóra og Neyðarlínunnar frá vegna aðildarskorts, en að mati kærenda í málinu snertir bráðabirgðaákvörðunin lögvarða hagsmuni, þar sem það væri vandkvæðum bundið að staðsetja símtöl í netsímaþjónustu.