Kókaínparið laust úr haldi

Gæsluvarðhald rann út í gær yfir íslensku pari sem handtekið var í Leifsstöð 6. júlí síðastliðinn. Fólkið, sem er á þrítugsaldri, var handtekið við komuna frá Frankfurt í Þýskalandi með eitt kíló af kókaíni falið á víð og dreif í skóm sínum. Við leit á heimili fólksins fannst svo eitt kíló af hassi.

Ekki var farið fram á framlengingu gæsluvarðhaldsins og hefur fólkinu því verið sleppt. Að sögn lögreglunnar í Reykjavík telst málið upplýst og er ákæru nú beðið.