Bíl ekið inn í anddyrið

Óhapp Fólksbíl var ekið á hús veitingasölunnar Hreðavatnsskála í Borgarfirði seinnipartinn í gær. Lögreglan í Borgarnesi segir ökumanninn hafa verið ungan að árum og að hann hafi ætlað að leggja bílnum við inngang hússins en hafi misst stjórn á honum og hafnað svo að segja inni í anddyri skálans.

Mjög fáir voru inni í skálanum þegar óhappið varð og engin meiðsl urðu á fólki. Bíll piltsins er að mestu óskemmdur en að sögn lögreglu skemmdist anddyri skálans þónokkuð.