Fólkið vildi Solano aftur

Graeme Souness segir að stuðningsmenn Newcastle hafi spilað stóran þátt í því að félagið ákvað að fá Nolberto Solano aftur á St James´ Park, aðeins nítján mánuðum eftir að hann yfirgaf félagið og fór til Aston Villa. "Nobby var alltaf í miklu uppáhaldi hjá stuðningsmönnum Newcastle og þeir söknuðu hans mikið þegar hann fór til Villa á sínum tíma. Það lá alltaf fyrir krafa um að fá hann aftur og við stóðum við hana," sagði Graeme Souness og benti á að leikmaðurinn væri öllum hnútum kunnugur hjá félaginu. "Hann elskaði stuðningsmennina og félagið, þannig að það má segja að Nolberto Solano sé kominn heim aftur," sagði Souness.