Liverpool lánar Le Tallec

Franski sóknarmaðurinn Anthony Le Tallec sem verið hefur hjá Liverpool í á þriðja ár hefur gengið til liðs við enska úrvalsdeildarliðið Sunderland á árslöngum lánssamningi. Le Tallec er tvítugur og var keyptur til félagsins ásamt Florent Sinama-Pongolle í stjóratíð Gerard Houllier. Hann hefur fengið fá tækifæri síðan Rafael Benitez tók við liðinu en síðan hann kom til félagsins hefur hann verið lánaður heim til Frakklands í tvígang, til St Etienne annars vegar og Le Havre hins vegar. Benitez setti hann sjö sinnum inn á af varamannabekknum á síðasta tímabili þar sem hann m.a. lagði upp mark fyrir Luis Garcia í 2-1 sigri á Juventus í Meistaradeildinni.