HK sló bikarmeistarana út

Óvænt tíðindi urðu í 16 liða úrslitum Visa bikarkeppni karla í kvöld þegar bikarmeistarar Keflavíkur töpuðu fyrir 1. deildarliði HK, 1-0 á Kópavogsvelli. Ólafur Júlíusson skoraði sigurmarkið í síðari hálfleik. Þá vann Fylkir dramatískan sigur á Grindavík þar sem Guðni Rúnar Helgason skoraði sigurmarkið á 90. mínútu í Grindavík. FH vann 3-1 sigur á KA þar sem Ólafur Páll Snorrason, Ásgeir Gunnar Ásgeirsson og Tryggvi Guðmundsson hafa skorað mörk Íslandsmeistaranna, Tryggvi úr víti en Jóhann Þórahallsson skoraði markið eftir undirbúning Hreins Hringssonar. Fram vann 3-0 sigur á 1. deildarliði Þórs á Akureyri og skoraði Víðir Leifsson tvö mörk en Ríkharður Daðason fyrsta markið. ÍBV vann 3-2 sigur á 2. deildarliði Njarðvíkur. Steingrímur Jóhannesson, Bjarni Rúnar Einarsson og Pétur Óskar Sigurðsson komu ÍBV í 3-0 en Aron Már Smárason skoraði tvisvar og minnkaði muninn fyrir Njarðvík í 3-2 eftir að hann kom inn á sem varamaður á 73. mínútu. Dregið verður í 8 liða úrslit keppninnar í hádeginu á morgun miðvikudag.